Против сите видови насилство...!

КРИЗЕН ЦЕНТАР „НАДЕЖ“

Здружение на граѓани за заштита на жртви од насилство

Скопје / Република Македонија

Информации за нас  |  Хроника  |  Сведоштва  |  Активности  |  Линкови  |  Пребарување  |  Почетна страна

ХРОНИКА НА НАСИЛСТВОТО

ВОЗАЧ НА ПРАТЕНИК ОД СДСМ, НОКАУТИРАЛ СТУДЕНТ ПРЕД ОЧИТЕ НА ПОЛИЦАЕЦ!
Кочанчанецот Љупчо Јанев, личен возач на пратеник на СДСМ од Кочани Ванчо Георгиев, и боречки судија од светски ранг, без причина нападнал и нокаутирал студент во саботата вечерта во центарот на Кочани. Нападот се случил пред очите на дежурен полицаец, кој воопшто не интервенирал, ниту пак се обидел да го легитимира напаѓачот. Згора на тоа, полицаецот му дозволил и да го напушти местото на инцидентот и не им го пријавил случајот на претпоставените во извештајот за своето дежурство. Градскиот совет на Кочани утредента му доделил награда "заслужен граѓанин" на Јанев, по повод 7 септември, денот на ослободувањето на Кочани.
Инцидентот се случил додека полицаецот вршел увид во лесна сообраќајна незгода во која студентот Владо Христов од Кочани бил сведок.
- Автомобил удри во моето паркирано возило и додека јас и возачот разговаравме, дојде Јанев и почна да кажува невистина дека во сообраќајката двете возила биле во движење. Реагирав и му реков на Јанев дека лаже и дека не бил присутен за време на незгодата. Истото му го кажа и мојот другар Владо. На тоа Јанев бурно реагираше и сакајќи да испровоцира инцидент, прво го удри Владо со мобилниот телефон, а потоа се стрча кон него и го удри со тупаница во вилицата, по што Владо падна на улицата. Побарав од полицаецот да интервенира, но тој рече дека не може да прави ништо. Јанев замина, а полицаецот не сакаше ниту да го легитимира, иако јас го побарав тоа од него - изјави Никола Стојанов, сведок на инцидентот.
По инцидентот полицаецот викна засилување, кое зеде податоци од Христов.
- Во понеделникот го пријавивме случајот кај началникот на кочанската полиција, кој утврди дека дежурниот полицаец воопшто не го пријавил случајот. Началникот не повика во станицата, каде што дадовме изјави за инцидентот, а потоа рече дека ќе спроведе дисциплинска истрага против полицаецот и прекршочна пријава против Јанев. Ако не побаравме помош од началникот, дежурните полицајци ќе му прогледаа на Јанев низ прсти и ќе ја злоупотребеа својата службена положба - тврди Стојанов.
Христов најавува дека со инцидентот ќе ги запознаат надлежните во МВР и претставниците на Хелсиншкиот комитет.
Од кочанскиот Градски совет дознаваме дека мислењата на советниците за доделувањето награда "заслужен граѓанин" на Јанев биле поделени.
- Поголем број советници во Градскиот совет не се согласија Јанев да ја добие наградата. Но и покрај нашите негодувања, Никола Серафимов, претседавач на Градскиот совет, сам му ја додели наградата на Јанев - ни изјави член од Градскиот совет на Кочани.
Во МВР го потврдија инцидентот, а кочанската полиција поднела прекршочна пријава против Јанев.

„Дневник“, 11 септември 2003

ОСУДЕНИ УБИЈЦИТЕ НА МАРИО!

Кривичниот совет на Основниот Суд Скопје 1, завчера (4 септември) ги осуди двајцата Роми, убијци на скопскиот средношколец Марио Георгиевски (18). Седумгошна казна малолетнички затвор добиле Б.Е. (17) од Скопје, а неговиот соучесник Р.М. (16) бил осуден на казна – од една до пет години престој во Воспитно – поправен дом. Осудените беа обвинети дека пред 7 месеци на грозоморен начин во центарот на Скопје го убиле Марио Георгиевски, ученик од ДСУ „Васил Антевски – Дрен“.

Д.В., „Дневник“, 6 септември 2003

ОТКРИЕН ПИШТОЛЏИЈАТА КОЈ ПУКАШЕ ВО АВТОБУС ВО ДВИЖЕЊЕ СО ПАТНИЦИ!

Деветнаесет годишниот Г.Б. од Македонска Каменица, по повеќедневна потрага бил приведен од Полицијата поради основано сомнение дека е извршител на кривичното дело – предизвикување општа опасност. Осомничениот на крајот на јуни годинава, во ноќните часови кај село Луковица, со пиштол што го поседувал без одобрение, пукал во автобус, сопственост на „Транскоп“ од Битола, што сообраќал на редовна линија Битола – Софија. Еден проектил од пиштолот оштеил еден прозорец на автобусот. За среќа никој од патниците не бил повреден. На седиштата кај прозорецот низ кој поминал проектилот немало патници. Проектилот минал во непосредна близина на седиштето од возачот на полниот автобус. Сето тоа се случувало во момент кога автобусот совладувал свиок покрај длабок амбис.

Г.Н. „Утрински весник“, 6 септември 2003

На почеток